ما هي NESA 

NESA أو (North East and South Asia) هو أحد برامج التبادل الثقافي التي تقدمها الحكومة الأمريكية لطلاب المرحلة الجامعية (بين 18 إلى 25 عاما) ... (3 ثانوي اللي رايح أولى جامعة، طالب أولي جامعة، تانية، وتالته، ولو سنة 4 يشترط إنه يكون باقي له تيرم واحد على الأقل لما يرجع بلده)، للدراسة بأحدي جامعات الولايات المتحدة الأمريكية لمدة عام دراسي (9 شهور تقريبا). البرنامج يشمل دول شمال أفريقيا والشرق الأوسط وجنوب آسيا.

التقديم امتى؟ وازاي؟
الاستمارة بتكون على موقع السفارة الأمريكية على شهر ديسمبر تقريبا (تابع من نص نوفمبر)، بتحملها من الموقع وتملأها إليكترونيا، وتطبعها وترسلها على عنوان السفارة الأمريكية، في ظرف مفتوح عليه اسمك واسم البرنامج ((NESA UGRAD. ممكن تسلمها بنفسك أو تبعتها عن طريق البريد (ركز في التوجيهات والتعليمات بالأبليكيشن)..

إيه الورق المطلوب مع الاستمارة؟ (لو ناوي تقدم السنة دي يبقى ابدأ ظبط ورقك حالا)
1- شهادة تويفل ب(سكور) score 500 أو أعلى في ، يكون الاختبار حديث (من أقل من سنتين).
التويفل المطلوب للمنحة Local، الامتحان 3 أقسام (سماع محادثات قصيرة وإجابة الأسئلة عليها) ، (جزء خاص بالقواعد والمصطلحات) ، (جزء قراءة، 10 قطع اقرأ وأجب عن الأسئلة). الشغل كله على كيفية إدارة الوقت داخل الامتحان، اسئلة كتير نسبيا في وقت قصير. السئال اللي متعرفهوش متفكرش فيه كتير علشان هيفوتك اللي بعده واللي بعده لو فكرت، اللي متعرفهوش خمن أي إجابة بسرعة.
تكون نايم كويس قبل الامتحان، وصاحي ومظبط نفسك ومستكنيص، علشان تبقى رايق 
2- خطابان تزكية على الأقل (إنك شخص محترم ومجتهد وملتزم وجدير بالسفر وإنه يرشحك لهذا البرنامج وهكذااا...).
3- بيان درجات مترجم إلى الإنجليزية ومعتمد من جامعتك مرفق معه النسخة الأصلية (الطلبة اللي لسه هتروح أولى كلية، تجيب شهادة الثانوية بالإنجليزية).
4- Personal Statement في حدود 450 كلمة (مهم جداااااااااااا) (تكلمهم عن نفسك، عايز تسافر ليه، وليه هتدرس التخصص ده، وهتعمل إيه لما ترجع بلدك) مهم جدا إنك تقنعهم بنفسك من خلال الورقة دي... احضر الsessions في الأميد إيست ومكتبة السفارة عن ازاي اكتب personal statement.
5- صورتين شخصيتين (4×8).
6- صورة البطاقة الشخصية أو صورة جزاز السفر.
على آخر يناير أو فبراير بيجيلك رسالة على الإيميل تعرف إذا استمارتك اترشحت ولا لا.
الاستمارات المرشحة، أصحابها بيعملوا مقابلة شخصية في السفارة مع القائمين على البرنامج.
بعد كده بيجيلك رسالة على الإيميل انت اتقبلت ولا لا...
تبدا بقى لو اتقبلت تخلص في باقي الورق (التقرير الطبي والفيزا وتصاريح السفر ..........).
السفر بيكون في أغسطس (غالبا) أو سبتمبر (حسب الجامعة بتبدأ الدراسة امتى)
لما بتسافر بيستقبلك ناس (موسسة) هناك هم اللي بيكونوا مسؤلين عنك في كل حاجة إلى نهاية البرنامج.
قبل السفر البرنامج بيظبط ورش عمل في بلدك مع الطلبة اللي هيسافروا علشان تعرف نبذة عن الدراسة هناك والحياة وكده.
بيكون فيه ورشة تانية أول ما بتوصل في واشنطن العاصمة لمدة 4 أيام تقريبا
علشان تعرف نظام الدراسة والأمور المتعلق بالمصاريف والمعيشة والسكن وخلافه.
قبل العودة لبلدك بشهر تقريبا بيكون فيه ورشة عمل أخيرة علشان يحضروك للعودة ويسلموا عليك 
ترجع بسلامة الله على مايو أو يونية
بعد كده السفارة الأمريكية في بلدك بتعملك يوم تستلم فيه شهادة المشاركة وتسلم عليهم وتاخد صورتين 

هل البرنامج للطلبة فقط؟ ولا الخريجين كمان؟
البرنامج للطبة اللي لسه في مرحلة البكالريوس أو الليسانس.. لسه مخلصوش جامعة.

هل فيه أي تكاليف أتحملها؟
البرنامج يتكفل بكافة مصاريف سفرك من وإلى بلدك، من جامعتك إلى مكان ورش العمل اللي ينظمها البرنامج، الضرائب، التأمين، السكن والتغذية، مصاريف الدراسة، الكتب 350$ في التيرم، مصروف شهري 300$، وبدل رسم دخول المتاحف والمزارات 250$ في التيرم. وبتسترد الميلغ اللي دفعته في التويفل.

هل انا اللي بختار الجامعة؟
اختيار الجامعة بيكون عن طريق البرنامج وليس للمتقدم دخل فيه 

إيه نظام الدراسة هناك؟
بتدرس المجال اللي حددته من البداية، والبرنامج يشترط على الأقل 50% من المواد تكون في تخصصك، ومادة لازم تكون عن US Studies . وممكن الجامعة تلزمك بدراسة مادة أو أكثر لغة إنجليزية (تختلف من جامعة لأخرى). ولازم تقديرك يكون 2.5 على الأقل في التيرم (وده مش صعب بالمرة وسهل جدا تجيب أعلى من كده). بتقدم تقارير من اساتذتك كل نص تيرم تقريبا للبرنامج المسؤل عن متابعتك.

إيه نظام السكن هناك؟
يتكفل االبرنامج بتوفير سكن للطالب بالمدينة الطلابية بالجامعة، الغرف بتكون زوجي (غالبا).

إيه نظام الأكل هناك؟
الأكل في البداية ممكن يكون صعب لك تتأقلم معاه، لكن مع الوقت كله بيتعود : Dأغلب الجامعات مفيهاش أكل حلال (مذبوح طبقا لأحكام الشريعة الإسلامية) زي اللي بناكله في مصر، لكن ممكن تتأقلم مع الأكل النباتي والسي فود (وغالبا بيكونوا متوفرين).. ولو أنت محظوظ هتلاقي عندك في المدينة مطاعم عربية او ماركت دولي عنده أكلات من دول عربية (انا كنت محظوظ بالأكل الحلال في الجامعة، ومطعم سوري، وماركت دولي فيه أكل عربي ) ….متحاولش تقلق كتير من ناحية الأكل لإنك هتتعود 

هل بيكون لي مصروف شهري هناك؟
الطالب له راتب شهري 300$ لمصاريفه الشخصية (الأكل والسكن ومصاريف الكتب يتكفل بها البرنامج) 
بتستلم حوالي 350$ كل تيرم (مصاريف كتب) .. ولو كتب مواد التخصص كلفتك أكتر من المبلغ ده بتبعت إيصال للبرنامج وهم بيبعتوا لك باقي المبلغ اللي انت تحملته.
لو بتعمل أنشطة ثقافية أو بتزور متاحف ومزارات بيكون ليك 250$ كل تيرم
لو فيه فواتير تبع الجامعة دفعتها تبعتها للبرنامج وهم بيبعتوا لك المبلغ

إيه تفاصيل ال Community Service وال Internship؟
التيرم الأول الطالب بيلتزم ب Community Service لمدة عشرين ساعة على الأقل (مش حوار بالمرة) 
التيرم الثاني يلتزم الطالب ب Internship لمدة 80 ساعة على الأقل
بتوصل لل Community Service أو ال Internship عن طريق إما زملائك في الجامعة أو هتلاقي مكتب مختص بالجامعة بيظبط الcv بتاعك يخليه حاجة فخيمة ويبدأ يدور معاك ... وغالبا بيجيبلك حاجة محترمة جدا ... لا تقلق

بس كده انا هيضيع مني سنة هنا!!!
في الغالب، يعتمد على جامعتك في مصر، لو أنت بتدرس نفس التخصص اللي بتدرسه في بلدك ممكن تدرس مواد هناك وتنقلها لجامعتك في بلدك علشان متدرسهاش مرتين.
لو أنت في جامعة مش متعاونة معاك، أو لو بتدرس تخصص مختلف عن تخصصك في بلدك (زيي كده)، مش هتقدر تنقل المواد اللي درستها... لكن أنت الكسباااااااااااااااان ... هناك أيا كان اللي هتدرسة .. بتتعلم وبتستفيد حاجة فخيمة بصحيح.. 
أضف إلى ذلك إن التجربة نفسها مش بتقتصر على الدراسة بس، أنت بتهيص grin emoticon هتستفيد جدا من الناس والثقافات والأماكن اللي هتزورها... هتعرف كتير عن نفسك.

هل ممكن transfer لل Credites اللي درستها هنا؟ أو اللي هدرسها هناك لما أعود؟ 
ممكن تنقل المواد اللي هتدرسها هناك لجامعتك في دولتك علشان متدرسهاش تاني، 
ولو أنت حظك حلو، ممكن تظبط مع الجامعة هناك وتنقل المواد اللي درستها في بلدك وتكمل دراسة هناك وتتخرج من هناك
 المنحة مش بتديلك شهادة زي البكالريوس مثلا أو شهاة تخرج، لأنك لم تنته من مرحلة تعليمية بعد، إنما بتحصل على مايثبت إنك درست بجامعة كذا بامريكا وبيان درجات المواد اللي درستها من الجامعة ......
فيه هناك أجازات كتير (الخريف، الهالويين، عيد الشكر، الشتاء، الربيع،.......) حاول تستغلهم كويس جدا، سافر كتير وشوف البلد.
حاول تفضي نفسك في الويك إند وزور المدن اللي حواليك.
استفيد من مكتبة الجامعة (مكان راااااااااااااااااائع هيخليك تحب تذاكر).
الجيم في الجامعة حاجة فاخر فاخر (متفوتش على نفسك فرصة التمرين في وجود إمكانيات رهيبة)
اطحن نفسك أنشطة تطوعية (في الجامعة وخارج الجامعة بالمدينة)
اختلط بالناس واتميز واعرف على قد ما تقدر
متفوتش فرصة SNOW FIGHTING ممتع جدا ومش موجود في بلادنا.
ابتسم دائما وخليك ودود مع الناس.
تبقى محظوظ لو عندك venture crew في الجامعة... دوس فيها وش
استحم كل يوم (قالولنا كده قبل ما نسافر).
هيكون مطلوب منك تاسكات من المسؤلين عن البرنامج في أمريكا، خلصها اول بأول.
أثبت نفسك في كل مكان ومع كل حد... سيب انطباع حلو عند الناس
علشان بلدك متوحشكش ومتحسش بالملل ومتتصلش باهلك تعيط لهم .... متسيبش نفسك لوحدك، املأ وقتك بالمذاكرة او مع أصحابك... متروحش اوضتك غير علشان تنام.
خيم في الغابات هناك، الطبيعة محصلتش، متعة لا تتصور
متفوتش على نفسك فرصة الاستمتاع بالتأمل في أروع المناظر الطبيعية للأشجار في شهر الخريف وتصويرها ( من أجمل فصول السنة هناك)
متنساش وأنت هناك تدون كل تجاربك ومغامراتك كتابة ولو مكسل سجلها صوت 

هنا معلومات تفيدك عن البرنامج 
لمزيد من المعلومات حول برامج التبادل المقدمة من الحكومة الأمريكية وكيفية التقدم لها،
يرجى زيارة الموقع الرسمي للسفارة من هنا
بالتوفيق وربنا ييسر لكم الخير حيث كان
By:Saleh Gamaly