ليه الأجانب بطلوا يزوروا مصر

عارفين ليه الاجانب بطّلوا يزوروا مصر؟

زميله في شركتي السابقه لقيتها عامله check inn في مكادي في الوقت اللي انا كنت فيه في الغردقه بخلص شويه شغل

رحت قابلتها هي وعيلتها وبقولها مبتجيش شرم احسن ليه

قالتلي مصنفه تصنيف امني برتقالي (ارهاب) ومفيش شركات سياحه في السويد ومعظم اوروبا بتوافق تطلعها من عندنا في السويد لا هي ولا الاقصر

ولما نزلنا هنا الغردقه حاولنا نشوف شركه سياحه تودينا الاقصر عشان دي امنيه والدتها من سنين مفيش ولا شركه رضيت ابدا

خدتني النخوه والجدعنه المصري مع شويه انسانيات لان والدتها مريضه ويا عالم هاتعرف تيجي تاني ولا لاء وكمان فقدت صديقه عزيزه في حادث قريب خلوني اتعاطف جدا مع الموقف

خلصت شغل وقولتلها اجهزي انتي ومامتك بكره مسافرين الاقصر

مامتها فقدت القدره علي النطق تقريبا من المفاجأه

ورغم ان مامتها كانت زميله لينا في نفس الشركه الا انها مبتتكلمش انجليش كويس فبقت مش عارفه تشكرني ازاي غير بنظره امتنان قتلتني فعلا

خدت الخطوه المجنونه وانا معرفش كتير عن خبايا الموضوع

غير تحذير من احمد داود صديقي المقيم في الغردقه اللي قالي

رجعونا من الطريق ده انا ومراتي الاجنبيه عشان معاهاش البسبور

لازم يكون معاهم باسبورتاتهم

توكلت علي الله ومن ٦٦ الصبح كنا عالطريق بالبريكفاست واللانش بوكس من الاوتيل عشان مش عارف هاكلهم ايه

احنا بنتكلم عن ناس من سقف دول العالم ومعايير الامل والشرب عندهم قاسيه فعلا

في اول الطريق من الغردقه لقنا واول كمين الظابط قالي معاك اجانب لف وارجع مليش فيه مش هاتعدي

عرفته انهم اصدقاء واني مش شركه سياحه ولا اوبر ولا عامل مصلحه ولا بلا بلا بلا

وعرفته انا مين وشخص بابليك فيجر طلع محترم بس قالي هاعمل محضر اثبات حاله بانهم مسئوليتك الشخصيه

ومضيت علي محضر انهم اصدقاء بجد بعد ما شاف صورنا السابقه عالفيسبوك في رحلتها من سنتين للقاهره

وعبر طريق سفاجا قنا وقنا الاقصر

عديت علي اكتر من ١٢ كمين كلهم وقفوني ونفس الهرري

اسؤهم بتاع مدخل طريق قنا الاقصر عايزين يرجعونا اخد طريق مصر اسوان الزراعي بحجه ان الطريق مش متأمن

قولتله معايا سلاح ومأمن نفسي مشاني بالعافيه

كان ظابط شاب من مدينه نصر وقالي عشان احنا جيران بس

ماجي والده بيا زميلتي كانت بتلف في المعابد زي الاطفال في جنه الشوكلاته

مش عارفي نمسكها ولا نتحكم فيها من فرحتها وشغفها بالاقصر واثارها

بتلمس الاثار زي العطشان اللي لقى عين ميه في صحرا

مش مهتمه تتصور ولا بتقف تبصلي اصورها

مهتمه بس تشوف وتملي عينها من امنيه حياتها وواقفه تشم هوا جوه المعبد واقولي

انا بشوف الزمن واثاره حالا

بيا زميلتي بطله السويد في مصارعه الذراعين الرست يعني زي ما بنسميها تعبت من كتر طلوع ونزول مقابر وادي الملوك

بتقولي ازاي انت فقرا كده وعندكم الكنوز المرعبه دي

الغردقه وشرم بالنسبه للاقصر تعبانين قوي

شويه بحر وطبيعه موجودين في مدن كتير في العالم

تايلاند احلي منكم وجوها معتدل وارخص ومعامله احسن من المصريين واتصور فيها افلام كتير خلاها مشهوره عنكم وسحبت منكم البساط بسهوله

الاقصر دي لوحدها تدخلكم فلوس قد قناه السويس عشرين مره

ولو مش عارفين تديروها هاتو شركات اجنبيه بنسبه وعموله

ازاي دوله كامله عايشه عالاستيراد

انت بتستوردو حتي البسكويت والبرنجلز والشوكليت والعصاير

انتم ازاي بتستوردو سكر وعندكم مزارع القصب دي كلها

وحتي السياحه مش فالحين فيها ولا في تأمين السياح علي ارضكم

انتو لو جيبتم شركات امن خاص هاتعرف تأمن السياح

وكله بتمنه والسايح هايدفع

بدل الرشاوي اللي بتاخدها الشرطه عيني عينك كده

ازاي مفيش خط مترو سياحي من المطار للاهرامات يكون غالي ونضيف وسريع السايح اللي نازل ترانزيت يروح الهرم في نص ساعه من المطار للهرم يقضي ساعتين ويرجع في وقت الترانزيت ويصرفله شويه دولارات انتو اولي بيهم وميركبهوش مصريين عشان انتو مبتحافظوش علي حاجه

التريلات اللي شايله احجار الجرانيت دي بتتصدر خام انتو مش عارفين الثروه المرعبه دي تصنعوها وتصدروها متصنعه ليه

انتو ليه عمالين تاخدو معونات من كل الدول وانتو عندكم كل مصادر الدخل دي

ليه معتمدين علي قناه بحريه وانتم عندكم النيل ده كله تزرعو بيه ملايين الافدنه

ليه بتستوردو سمك وانتو عندكم الشواطئ دي كلها

ايه الشمس المرعبه دي ازاي مفيش محطات توليد كهرباء من الشمس ورايحين تعملو محطه نوويه بالسلف

المانيا بتصدر كهرباء لدول كتير في اوروبا دلوقتي من الطاقه الشمسيه ومعندهاش ربع الشمس بتاعتكم

انتو ازاي عمالين تقفلو مصانع بدل ما تفتحو مصانع وانتو دخلكم واقع وفرصه للتصدير مع انخفاض عملتكم عالميا

عايزين تعرفو زميلتي قهرتني اكتر بايه

واخدين الاوضه دبل اول انكلوزيف هارد درينك والطيران من السويد للغردقه والعوده بالانتقالات الداخليه لمده اسبوع ب ٩٠٠ يورو الفردين

الاوتيل اللي كانو قاعدين فيه الليله للمصري سينجلً ب ٩٠ يورو

واقل تذكره طيران مباشر رايح جاي ب ٣٥٠ يورو

يعني الفرد السائح في اسبوع بيدفع قد المصري ما بيدفع في ليله