إزاي تسكن ببلاش Couchsurfing

مع ارتفاع سعر الدولار واليورو اصبح السكن غالى جدا دلوقتي على كل المسافرين.
وزي موعدناكم قبل كده إننا هنتكلم بالتفصيل عن إزاي تسكن ببلاش فى أكتر من 5 مليون مكان إستضافة فى 120 ألف مدينة حول العالم،
الموضوع تم شرحه بالتفصيل  فى 5 صفحات من كتاب "سافر"
فى موقع اسمه "كاوتش سيرفنج" Couchsurfıng الموقع ده بيعمل إيه ؟
تقدر تقول إنهم شوية شباب وبنات مجانين بيعشقوا السفر والترحال وتكوين الصداقات والتعرف على الثقافات من جميع أنحاء العالم ! ايوة يعني عملو ايه ؟
انا مثلا عندي شقة فى القاهرة وعندي اوضة فاضية فيها أدخل على الموقع واعمل حساب وأقول ان عندي أوضة فاضية و أى حد من جميع أنحاء العالم ينزل مصر ممكن يقيم فيها بس بشرط يقولى قبلها بفترة كافية وبيكون فى تفاصيل عنك من خلال حسابك على الموقع يعني زي اهتماماتك ، دراستك ، البلاد اللى زورتها ، بتتكلم كام لغة وممكن كمان تحط صور للمكان وهكذا الفكرة دي انتشرت جدا والموقع ده وصل أن عليه دلوقتي أكتر من 5.6 مليون مكان إستضافة فى 120 ألف مدينة حول العالم

بناء عن خبرتي 5 سنين بستخدم الموقع هقولك على شوية نصايح لازم تعملها
علشان لما تبعت طلب لأي شخص يقبل يستضيفك بسهولة:-

1- اكتب كل البيانات المطلوبة منك فى الحساب بطريقة إحترافية.
2- نزل صور للمكان اللى هتستضيف فيه الناس.
3- اكتب إنت هتقدّم إيه للشخص اللى هينزل عندك وكذلك انت هتقدم إيه للشخص اللى انت عايز تنزل عنده (يعني مثلا ممكن تعلمه لغة او كورس فى مجالك أو هتكلمة عن ثقافة مجتمعك أو انك شخص مرح وهتخليه مبسوط بوجودك عنده ... المهم تبيّن ايه أفضل حاجه انك ممكن تقدمها للى هيستضيفك)
4- حاول تخلى أصدقائك يعملولك مرجع أو توصية إنهم نزلوا عندك وانك شخص لطيف ومحترم وانهم استمتعوا جدا وهما عندك .. كده كده هما أصلا نايمين عندك أكل وشرب ونوم ببلاش خليهم مرة يعملوا حاجه تفيدك، وكمان الموقع بيديك عضوية مجانية 3 شهورلما تستضفت أي شخص ، دي صورة من تجديد عضويتي لمدة 3 شهور مجانا لما استضفت آخر شخص عندي.



5- حاول ان مدة الزيارة تكون سريعة يعني من 1 ل 5 أيام بالكتير (مش تطلب إنك تقيم شهر عنده أكيد مش هيقبل طلبك)
6- مش معني إنهم أجانب و اوبن مايندد يبقي تدخل تبعت استضافة عند بنات بس .
7- فى بنات بتقبل بس مش كتير وهتتعب عشان تلاقي بنت تستضيفك عندها فـ بلاش السكة دي ، وبالنسبة للبنات الموضوع مختلف.
8- حاول تخلي الحساب بتاعك موثّق .. 50 دولار فى السنة ده بيضمن إنك شخص جاد وفعلا محتاج الخدمة، يعني انا مثلا مش بقبل شخص الأكونت بتاعه مش موثّق.
9- قبل متبعت إستضافة لأي حد أدخل شوف حسابة كويس جدا وإعرف هو مين ومهتم بإيه وبيتكلم لغات إيه وإنه مناسب إنك تنزل عنده أو لأ، وكمان استخدم تفاصيل من حسابه لما تبعتله رساله "يعني لو هو كاتب إنه نزل مصر وانبسط فيها، اكتبله سعيد انك نزلت مصر وانبسطت وأكيد هتنزل تانى وممكن نتقابل .... وهكذا" شوف ايه الهوايات اللى مشتركين فيها وابدأ اتكلم معاه فيها. النقطة دي مهمة جدا بتبين إنك مش بتبعت لأي حد وخلاص وكمان تحسسه إنه حد مميز.

اشترك حالاً من خلال الموقع الرسمي من هـنـا

تعرف كمان انك ممكن تسكن ببلاش وكمان تكسب فلوس
 اعرف كل التفاصيل من هنـــا