من مسابقة قصتي مع سافر
المسافر: أحمد رشاد - أنطاليا - تركيا
الموقف اللى حصل معايا كان لما حبيت اروح انطاليا 
انا كنت فى اسطنبول اسبوع و كانت اول مره اسافر فيها بره مصر و كنت لوحدى 
قررت انى اخطف 24 ساعة فى النص اروح انطاليا اروح اعمل Rafting و بالمرة احضر عرض Fire of Anatolia لأنى بعشق العرض و كنت حضرته فى مصر
و فعلا حجزت الطيارة من اسطنبول و للأسف اتأخرت ساعة و كنت مضبط عربية تنقلنى من المطار للفندق لأنى كنت نازل فى مكان اسمه Side بعيد عن المطار و مكنش عندى فكرة ازاى هوصل
المهم وصلت الساعه 2 بليل ملقتش العربية و ال Tour كانت الساعة 9 الصبح و لازم اوصل الفندق
لقيت قدامى اتوبيس Havac و ده اللى كان وصلنى من تقسيم لحط مطار صبيحة 
المهم قولت اركبه و انزل ال Central bus station و اشوف اى حاجه رايحة Side 
وصلت المحطة الكل نايم و مفيش حد ، صحيت واحد من اللى فى الشباك بسأله قالى لأ مفيش من هنا ل Side 
تاخد اتوبيس Manavgat و بعدين من هناك تنزل Side و الأتوبيس هيطلع كمان ساعتين نام على الكراسى هنا و انا هبقى اصحيك
و فعلا نمت و جه صحانى على معاد الإتوبيس كان الساعه 4 الفجر
ركبت الأتوبيس ووصلت Manavgat لقيت برده المحطه طبعا الكل نايم و كانت الساعه لسه 5 ونص
المهم قلت اطلع على الشارع و انا و حظى
لقيت بنت قاعدة فى المحطة من حظى كانت تعرف إنجلش اقعدنا اتكلمنا شوية و هى اللى شرحتلى بقى اعمل ايه
و انى لازم انزل ال Downtown الأول و بعدين من هناك اركب ل Side
و فعلا وصلت الفندق الساعه 8 الصبح و اللطيف ان ال Tour باظت و اتخانقت مع الشركة عشان مفيش حد منهم وصل فى المعاد
و قررت انى انزل البحر و الف فى البلد شوية و اريح ساعتين فى الموتيل عشان طبعا لازم اخد الطريق ده كله تانى للمطار عشان طيارتى الساعة 7 الصبح
و فعلا مشيت من Side الساعه 6 عشان الحق اوصل و فعلا وصلت المطار الساعه 11 لأن كانت حصلت مشكلة فى اتوبيس Havac
مع سواقين تانيين و مبقاش في غير الإتوبيسات العادية
و نمت لحد الساعه 6 الصبح فى المطار و رجعت اسطنبول
الفايدة اللى طلعت بيها من الموقف 
انى اتعرفت على اتنين واحدة فى المطار وواحدة فى محطة Manavgat و الكلام مع حد من بلد تانية بيبقى ممتع وانى عرفت اتصرف واستمتعت بغض النظر عن اللى حصل.