قصتي مع السفر لفرنسا

أولا أحب اشكر شركة سافر على التشجيع للسفر! و ان هي اعطت حلول فعلا خارج الصندوق لفكرة السفر.
انا اسمي محمود الحلو و خريج من جامعة الاسكندرية كلية السياحة و الفنادق قسم ارشاد سياحي و تقدير امتياز و الحمد لله جاتلي منحة من الاتحاد الاوربي بسبب تفوقي و قدرت اني اجتاز كل المتطلبات اللي محتاجنها و سافرت الي فرنسا في مدينة ليل يوم 1-9-2013 لكن قبل السفر لازم اعرفكم اني مكنش في دماغي فكرة السفر نهائي و لحد دلوقتي بردو بغض النظر اني مرشد سياحي و بتكلم انجليزي و الحمد لله بقيت بتكلم فرنساوي و شويه كده الماني بس كنت ضد فكرة السفر من اجل الهجرة لاني اؤمن ان من ليس له وطن ليس له اهل و لا حياة للاسف و بلاش تقوله ايه شغل الوطنية ده هتعرفوا لما تسافروا بعد كده ان شاء لله ! 
ثانيا انا هتكلم عن رحلة سفري تقريبا زورت معظم البلاد الكبرى زي فرنسا- بلجيكا- هولندا- المانيا- ايطاليا .... لسه ان شاء الله اسبانيا بعد مناقشة رسالتة الماجستير,,,ادعولي بقى 
انا عايش في مدينة ليل في فرنسا و هي في الشمال على الحدود مع بلجيكا يعني الشارع اللي ورايا فعلا شارع في بلجيكا و ناس معهم جنسية تانيه و لغة تانيه فده في حد ذاته حاجه حلوه اي اداني فرصة للاختلاط بالثقافه و ناس غير لغتي .. مدينه ليل تعتبر من اكبر المدن في فرنسا بعد باريس و ليون و هي من اجمل المدن اللي حبيتها بعد الاسكندرية .... الجمال في ليل هنا انها ملتقى بين انجلترا لاني بيني و بين بحر المانش بتاع ابوهيف ده حوالي ربع ساعه و بين بلجيكا حوالي عشر دقايق و باريس ساعه ممكن تقولوا اني محظوظ .
الصعوبات اللي واجهتني هنا هي اللغه بصراحه كان الموضوع بالنسبة لي معقد و كمان الدراسه بلفرنساوي لكن انا مستسلمتش و استحضرت فيلم النمر الاسود و مهمد خسن و اتقدم و الكلام ده كله و الحمد لله بعد حوالي شهرين من المذاكره القويه كنت عملت اول مناقشه بالفرنساوي و اجتزتها و نجحت فيها و تقريبا ده كان اول انطلاقه ليا ! الدراسه بره مصر عالم تاني ! ناس بتسابق الزمن فعلا يعني انا بدرس الاثار هنا و اتعلمت معاهم 4 كتابات و هي الهيروغليفي و الهيراطيقي و الديموطيقي و القبطي كل ده في سنه واحده فقط مقابل مصر اتعلمت فقط الهيروغليفي ! بعكس بقى انهم بياهلوك ان فعلا تكون باحث محترم و غير بقى من المعاملات الرائعه اللي انا اتعلمت منها كتير. اتعلمت اللغه في شهرين ده في حد ذاته انجاز الدكاتره مكنوش مصدقين ازاي اتعلم لغاتهم و هما مش عرافين حتى يتكلموا عربي مكسر بس الحمد لله فضل من عند ربنا. 
عمري ما هنسا اول مره اخش فيها متحف اللوفر و اقف اودام التماثيل بتاعتنا و اشرح لاصدقائي بقى كان احساس لا يوصف او اقف اودام المسله بتاعتنا اودام الكونكورد و اشرح للاصدقاء فرنسيين ان ام كلثوم لما جاءت الي باريس و سالوها ايه اجمل معلم سياحي زورتيه قالتلهم المسله المصرية بصراحة اجمل مدينتين انا زورتهم هم باريس و امستردام بجد روعه لازم تزورهم باريس فيها ريحة كده بجد عمرك ما هتشمها في اي مدينة هي ريحة البارباس 
الفرنسيين شعب جميل اوي اوي بجد شعب مسالم و عندهم حتة الاصدقاء دي حاجه محترمه بجد و ياريت مثلا فكك من الافكار العشوائيه بتاعت اني اول ما هنزل اوربا تفكيري كله اني اتجوز اجنبيه علشان الجنسية و الكلام الفارغ ده لانهم هنا خلاص عرفوا اللي فيها مفيش احلي من البنت المصريه و الحمد لله ربنا بعتلي هدية من عندة و هي سهيله اللي مستحملاني و وقفت جنبي و مستحملة غيبتي دي كلها و ده في حد ذاته شئ انا سعيد به جدا و بحبها حب لا يوصف بجد من اجمل الاشياء اللي ربنا رزقني بها لاني بجد كل ما حد يقولي اوصفها مبعرفش الا اقول اني لقيت فيها كل حاجه حلوه بس كده ...... 
بوصم من اهم حاجه في حياتك هي الشجاعه و انك تعيش حياتك انت لسه شاب روحوا سافروا و لفوا بلاد و عيشوا اللحظه و اعملوا لنفسكم خبرة حلوه السفر نعمة انك تروح و تسافر و تتعرف على الناس و تتصور وو تشوف حجات بتشوفها في الافلام بس و اتعرف على الثقافات فكك من كلام الناس و اووعى بنات الغرب و مش عارف ايه مفيش الحجات دي يا جماعه خالص مش هتنزل من الطياره هتلاقي الفلوس و البنات و كده !! ارتقوا شويه و فكروا بعقليه احترافيه و فكك من حوار الغربه و مش عارف ايه مفيش غربه في السفر مسيرك هترجع مصر !!! سافرووووو و خدوا خبره و شوفوا الناس و احتكوا بها و عيشوا في سلام نفسي !! 
اهم حاجه انك متركبش مواصلات كتيره ابعد خالص عن المواصلات امشي كتير كتير و شوف العماره و شوف الناس ببتعامل ازاي ! انا اتتعلمت الفرنساوي و بقيت لبلب في شهرين فقط مذاكره و نزلت طبقت و بتعلم بلجيكي او فلاميش علشان اكتسب خبره الحياه في فرنسا رخيصه اوي اوي اوي بجد يعني 30 يورو يوميا تعيشك برنس و تاكل و تشرب و تركب مواصلات يعني زي 30 جنيه كده !!!! 
الناس هنا بتحب بعض اوي يعني لو لقوا حد بيرقص في الشارع ممكن يصقفوا و يرقصوا سوا ناس عايشين ! و حاجه تانيه بلاش شغل المصريين و تقعدوا تبوصوا عليهم اكننا جايين من كوكب عطارد عيش الجو 
حاول انك متتعرفش على مصريين كتير انت في سفر يعني اترعف على ناس جديده و كمان ياريت يكون معاك صاحبك علشان الاجانب مش بيحبوا التصوير زيينا ,, 
حاول يكون معاك اكل من البيت تكون عامله بليل علشان توفر فلوس و تقعد فتره كبيره معاك فلوس !! 
اقرا كتير اوي اوي قبل زيارة كل مدينة علشان يكون عندك خطه تزور ايه و متزورش ايه !! 
في كتاب اسمه 200 يوم حول العالم حلو اوي اتعلموا منه ثقافات الاخريين و عيشوا بخيالكم قبل السفر ده في حد ذاته شي رائع ! 
اقرا كتير و عيش في سلام نفسي و رحب بكل الثقافات و ففكوا من شل الستنيات و السبعينات و اللي تعرفوا احسن من اللي متعرفهوش لا انزل و سافر و اكتشف اماكن
سافر و سافر و سافر ان شاء الله لو هتروح جمصه اتعرف هناك على ناس و سافروا سيوه و سانت كاترين و الغردقة اهي في مصر مش بقولكم اوربا ! تقريبا دي كل حاجه ممكن تفيدك في السفر ,

محمود الحلو-ليل-فرنسا

من مسابقة #قصتي_مع_السفر