قصتي مع السفر حول العالم
انا بكتب الكلام ده في أتوبيس رقم 68 المتجه لشارع Pierrefonds في Montreal, Canada انا بدأ معايا حلم السفر بدري شوية كان من 3 سنين كان عندي 19 سنة.
كان في البداية لما بتكلم عن السفر كانت كل الردود .. أيه يابني ده انت لسة 19 سنة ركز ف المذاكرة انت بس
بس فعلا في شهر يونيو انا كنت علي وشك السفر لدولة من دول أوروبا بس الموضوع كله باظ بسبب الفيزا. مخبيش عليكم في السن اللي كنت فيه قلت خلاص اللي نفسي فيه مش هيحصل، كمية الاحباط كانت كبيرة حبتين بس الاحباط مكملش كتير لأن ف 30/01/2013 انا كنت علي باب الطيارة اللي رايحة اسطنبول، تركيا ... روحت تركيا أسبوع وروحت لوحدي مكنش معايا حتي صاحب، الانبساط اللي حسيته الاسبوع ده كان تقريبا الأقرب لفرحة مجدي عبدالغني بعد الجول بتاعه في هولندا كاس عالم 90.
بعد الأسبوع ده رجعت مكنش ورايا غير اني احكي علي اللي شفته وكسبته، بس حسّيت اني انا نفسي لسة مشبعتش، مكملتش كام أسبوع وبدأت احضر لتاني مرة سفر.
يوم 30/4/2013 كنت علي باب الطيارة تاني في أقل من 4 شهور بس المرة دي كانت بانكوك، تايلاند. والأسبوع فات ورجعت و قعدت احكي كالعادة بس الفكرة اني كنت لما بكلم نفسي دايما كنت بقول الأسبوع ده ولا حاجه لأَنِّي محتاج اكتر من كده مده في البلد اللي هاروحها، ويوم 30/7/2013 انا كنت علي باب الطيارة لقالت مرة بس المرة دي الهند، بس مش أسبوع دول 6 أسابيع في بلد من اجمل بلاد الارض، الخبرة اللي كسبتها في ال 6 أسابيع دول عمري ما كنت اكسبهم لو كنت في مكاني بذاكر و انجح و اخرج و أفضل في نفس الدايره المفرغة دي. روحت Surat, India.
وفي الهند انا قابلت اكتر من 52 شخص من اكتر من 25 دوله علي مستوي العالم، التنوع الثقافي كفيل يعلمك حاجات لو فضلت طول عمرك بتتفرج علي افلام اجنبي مش هستوعبها. وبعدها رجعت بس المره دي كانت غير لأَنِّي مبطلتش احكي عن اللي شفته وكسبته، وقلت كفايا كده. بس هي كام شهر وبدأت احضر لرابع مرة في وسط ناس كل اللي بتقوله عني اني مجنون، وفعلا المرة دي بدأت اشيل فلوس عشان اجيب التذكرة ومصاريفي وفعلا وبعد سنة من اول مرة اسافر و في يوم 30/01/2014 كنت علي باب الطيارة لرابع مرة و المرة دي سانت بطرسبرج، روسيا وبردو كانت 6 أسابيع، و كسبت كتير من اكتر بلاد مختلفة عن مصر، ورجعت و مبطلتش كلام و كنت ولازلت جنون السفر هيقتلني، بس انا غالبا مش قادر عليه لأن في 22/07/2014 كنت علي باب الطيارة لخامس مرة في اقل من سنتين، بس المرة دي لكندا
نصيحتي ليك أوعي تمسك العصاية من النص، دايما خليك طماع في الاستفاده، أوعي توصل لدرجه تقول انا كده تمام، اللي هتكسبه انت مش متخيل قد آيه لانه اكبر بكتير اوي انك تقوي الانجليزي بتاعك.
سافر .. السفر تحدي، مش فيزا و تذكرة، السفر طموح، السفر استثمار في شخصية في يوم هترجع تنقل بلدها للافضل.
Abanoub Youssef 
