إزاي تشتغل وتوفر تكلفة الإقامة وانت مسافر

الموضوع ده للناس إللي مسافرة بحث عن عمل أو سياحة (مش عائلية) وحابة توفر تمن الإقامة (مبيت وأكل وشرب) خصوصا لو فترة الإقامة هاتبقى كبيرة.

فيه موقع اسمه Workaway كل فكرته إن بيبقى فيه حد معين في مكان معين عنده بيزنس أو أعمال خاصة بيه ومحتاج فيها مساعدة مقابل توفير الإقامة والأكل والشرب للشخص المساعد إللي هايستضيفه عنده.

* الخصائص:
- نوع الشغل بيختلف من شخص للتاني وبيبقى على حسب طبيعة بيزنس الشخص المستضيف، بس معظمها تقريبا بيبقى في مجال المساعدة اليدوية في المزارع العضوية أو الهوستيلز. على سبيل المثال لا الحصر: (Gardening, Building, Cooking / shopping, General Maintenance, Help in the house, Language practice, Help with Computers / internet, Other)
- عدد ساعات الشغل بتبقى غالبا أقصاها ٥ ساعات في اليوم ولكن هي عامة برضوا بتختلف من شخص للتاني، يعني وارد تلاقي كل إللي المطلوب منك ساعتين بس في اليوم أو إنك تقدر تخلص المطلوب منك في ساعات أقل وهكذا.
- بيبقى ليك يومين راحة في الأسبوع
- مدة الإقامة بتبقى على حسب الاتفاق المبدئي ما بينك وبين الشخص المستضيف
- أحيانا كتيرة بتلاقي متطوعين تاني معاك
- كل طرف بيبقى ليه تقييمات على الموقع ومن خلالها كل واحد يقدر يعرف إذا كان الطرف التاني محل ثقة ولا لأ (يعني انت تحاول الأول تراسل المستضيفين إللي عندهم تقييمات كتيرة كويسة الأول، وفي نفس الوقت المستضيف برضوا بيشوف تقييماتك)
- طبعا لما تشترك جديد في الموقع لازم تهتم بإنك تظبط بروفايلك الأول وتكتب كل المعلومات الخاصة بيك (تعرف نفسك وتوضح مهاراتك ونوعية الشغل المهتم بيه واللغات إللي بتتكلمها وهكذا) لأنه بيبقى مهم للشخص المستضيف يتعرف عليك كويس في الأول قبل الاتفاق.

* الاشتراك:
- طبعا حاجة زي كده مش هاتبقى ببلاش. الاشتراك بيبقى 36 دولار في السنة.
- طريقة الاستخدام (بعد الاشتراك) :
- بتختار القارة وبعدين الدولة وبعدين المدينة أو الولاية أو المقاطعة أيا كانت
- الموقع هايعرضلك كل المستضيفين المتاحين في المنطقة إللي اخترتها
- تبدأ تشوف كل واحد طبيعة شغله إيه وطالب مساعدة من أنهي نوع
- ماتنساش برضوا تقرأ التقييمات إللي عنده من الناس إللي قبلك
- لقيت كل حاجة تمام، هاتلاقي زرار مراسلة في صفحته. تبدأ تراسله وتشرحله موقفك وتوضحله لو فيه أمور معينة محتاج تتفق معاه فيها)

* الاستفادة:
- بجانب إنك هاتوفر تمن الإقامة كاملة لمدة ممكن توصل لشهر أو أكتر ف انت برضوا هاتقدر بأسلوبك تكون علاقات مع أهل البلد نفسهم والمتطوعين التانيين إللي معاك، والعلاقات دي أكيد هاتقدر تستفاد منها بشكل أو بآخر على حسب احتياجاتك

* معلومات مهمة:
- الشغل مش بمقابل مادي
- لا يصلح للمتزوجين والعائلات بطبيعة مجتمعنا (لكن طبعا الموضوع فيه حرية كاملة)
- لا يصلح للناس إللي بتتكسف أو بتصعب عليها نفسها وكده
- مافيش ضوابط أو هيئة رقابية ع الموضوع. أقصى حاجة ممكن تحصل هي إجراءات من إدارة الموقع على حساب الشخص وهكذا
- فلوس الاشتراك بتتدفع للموقع مش للمستضيف
- ما تشتركش قبل ما يكون معاك فيزا الدولة إللي رايحها (المستضيفين موجودين مش هايطيروا)
- المستضيفين مالهومش دعوة بيك إلا لما توصل لمكانهم وتبقى معاهم (يعني ماحدش هايبعتلك دعوات زيارة أو حتى هايروح يستقبلك في المطار)

* تجربة شخصية لمصطفى هوارى كاتب الموضوع:
- أنا جربت الموضوع ده شخصيا قبل كده أنا وواحد صاحبي في جورجيا. قعدنا في هوستيل أسبوع مع ٤ متطوعين تانيين من دول مختلفة (فرنسا - نيوزيلاندا - جنوب أفريقيا - ألمانيا) وبقينا أصحاب جدا وبنزور بعض أحيانا. طبيعة الشغل وقتها كان حوالي ٤ ساعات بس في اليوم والمهمة كلها إننا كنا بنحفر علشان بنزرع بصل تقريبا 
- الموقع متاح في كل دول العالم (حتى مصر) وفيه اتنين أصحابي أجانب وصلوا مصر فعلا واستفادوا منه (الغالبية بتبقى في دهب وشرم والأماكن السياحية)

اشترك فى الموقع من هنــــا

صور من المشاركة 

شكر خاص لمصطفى هواري على مشاركة القصة