خلاصة تجربة 3 سنين فى تركيا


 

 عن تجربتي ثلاث ٣ سنوات في تركيا
 
 من كتر ما الواحد خاض تجارب كتير "جدا" في تركيا، حسّيت انه من الواجب انقل جزء من الخبرات دي لحضراتكم ، هحاول على قد ما اقدر اختصر التفاصيل :
بعد ما درست في ٣ جامعات في مصر من ضمنهم AUC ، وكنت صاحب شركة في مصر وزي مانتوا شايفين الوضع اد ايه جميل في مصر ، جيت تركيا ،ولما جيت هنا في الاول مفيش اي حاجة كانت مفيدة بالنسبالي من خبرتي في مصر كنقطة بداية في اسطنبول غير اللغة الانجليزية لكن كل حاجة بعدها فادتني في اتجاه مختلف ، مبدئياً اللي عنده لغة انجليزية قوية يقدر يشتغل بتركيا في اكتر من مكان ، المدارس " وانا اشتغلت في مدرسة تركية واشتغلت في مدرسة عربية " والرواتب في المدارس المحترمة كان في حدود الألف دولار متوسط، اللي ميلاقيش شغل في مدارس يقدر يشتغل في مراكز تدريس اللغة الانجليزية ودي موجودة كتير جدا واشتغلت في اكتر من مركز زي English time وغيره والمراكز دي بتدي للمدرس في حدود ال٢٥ ليرة للساعة ، وفِي اتجاه اخر هو الدروس الخصوصية ودي برده جربتها والحد الأدنى  للساعة هو ٥٠ ليرة للمدرس، من ضمن الحاجات اللي ساعدتني اني من اول يوم دخلت فيه تركيا بدأت ادرس لغة تركي والحمد لله أتقنتها في وقت قليل ، ودا بدأ يفتحلي مجالات تانية، تعاملاتي مع الاتراك اصبحت اكثر راحة بسبب اللغة ، اشتغلت في العقارات وميزة العقارات ان دخلها كبير وشغلها مش صعب لكن محتاجة تسويق وعلاقات ودماغ كويسة وضمير ،واهم ميزة ان مش محتاجة راس مال ، ومع اللغة التركية وشهاداتي اشتغلت في تخصصي في إدارة الموارد البشرية في كذا مؤسسة من ضمنها مؤسسة من مؤسسات الدولة ، بعد فترة بدأت اشتغل في التجارة ، والموضوع مش صعب لكن اتعلمت منه كتير والحاجة اللي مشت اكتر في التجارة في الاول كانت تصدير ملابس تركية ، "الاسواق معروفة كلها بتاعت المصانع والجملة " والخطوات مش صعبة محتاج تبدأ اما برأس مالك او رأس مال غيرك، محتاج فقط موزع كويس في البلد اللي هتصدر ليها ولان المنتجات كويسة فهي بتسوق نفسها بشكل كبير،اسطنبول حاليا بتصدر كم من السلع الغير طبيعية والتصدير هنا اسهل من الاستيراد من حيث الإجراءات وتسهيلات الحكومة لان الدولة بتشجع الصادرات طبعا اشتغلت في احدى الشركات الكويتية الموجودة ب اسطنبول كاستشاري ودا دخلني كتير في قصص السياحة "بأنواعها"والاستثمارات بأنواعها ، والإقامات واستثنائتها وانواعها والضرايب والقانون التركي
اشتغلت في التدريب الاداري والشخصي واستشارات الصحة النفسية في اكتر من مدينة في تركيا ومازلت،
اشتغلت مع جمعيات خيرية ومؤسسات مجتمع مدني ،تعاملت مع ساسة ورجال اعمال وحتى وزراء مع موسسات إعلامية وتجارية وأنتجت فيديو كليب لأغنية رمضانية غنيتها في رمضان اللي فات🎬  ومؤخراً اشتغلت مدير لإحدى الفنادق والآن اعمل بشكل حر...

نقاط مهمة عن الحياة في تركيا:
•اسطنبول هي الوجهة التجارية الاولى في تركيا  - كم المؤتمرات والمعارض الدولية في كافة المجالات غير طبيعي ودا الأساس ومفتاح النجاح " احضر معارض ومؤتمرات وأيفنتات على قد ما تقدر لأن دا اللي هيفتحلك علاقات وآفاق جديدة في التفكير والعمل
•اسطنبول المعيشة فيها غالية نسبيا لباقي المدن التركية وتحديدا الايجارات
•الوجهة الوحيدة في تركيا ليست اسطنبول ، فيه مدن تانية وتقدر تلاقي فيها عمل والمعيشة هناك أرخص لكن فرص الطموح للافضل هناك فقط ربما تكون اقل من اسطنبول ، انا تقريبا روحت اكثر من عشر محافظات في تركيا وشوفت ناس اجانب كتير شغالين في محافظات تانية غير اسطنبول 
 •يوجد الكثير من الأفكار والمشاريع التي لم تصل لإسطنبول ،على حسب اطلاعك ومعرفتك هتقدر تعمل حاجة جديدة وتحقق حالة نجاح
•اللغة مهمة جدا في تركيا لكن فيه ناس بقالهم سنين بيشتغلوا في تركيا ومش معاهم لغة ، الموضوع معتمد على طبيعة الوظيفة "مثال المدرسين الأمريكان اللي كانوا معايا في احدى المدارس بقالهم سنين وميعرفوش غير كلمتين تركي واعرف مدير مدرسة عربية هنا بقاله ١٦ سنة ومش بيتكلم لغة (بس برده اللغة مهمة)
 •لو رؤيتك الوحيدة في الحياة انك تلاقي وظيفة فالحياة هتمشي بصعوبة معاك لان مفيش وظيفة بتستمر وتكاليف الحياة بتزيد عليك 
•تركيا بلد نضيفة وجميلة لكن انظمتها بيروقراطية من الدرجة الاولى
•اللي هيساعد في تحقيق نجاح اي مشروع او فكرة هنا بعد ربنا مش الفلوس لكن فريق العمل اللي هتكونه
 •مع توافد الملايين في السنين اللي فاتواعلى تركيا فدا بيأثر على حجم الوظائف المتاحةحاليا لكن مش بيأثر على اصحاب الأفكار الجديدة
•لو انت سنك تحت الثلاثين فأنت في سن التجارب ومفيش اي داعي للخوف من اي حاجة  لان الاستفادات والخبرات هتخلي عندك تجربة ناجحة مهما كانت الأخطاء اللي فيها "دا سن تكوين الخبرات"
فيه أوقات كتير هتحتاج فيها صبر وريستارت لنفسك ودي اختبارات كده من عند ربنا
•No risk No Rezk 
•No pain No gain
•No mistakes No experience 
•No women No cry 😄
 ونختم بنصيحة مهمة فعلا والله للشباب بصوت الأخت الفاضلة شاكيرا 
واغنيتها 😌try everything 
المصدر: ياسر راشد

 

سافر أوروبا سياحة تركيا سفارة إقامة