من قصص السفر إلى البرازيل
قصةرقم (2)
إسمي مروة .. بشتغل أخصائية ترميم آثار و مشاركة في مسابقة #قصتي_مع_سافر
حلم كبير من أحلامي كان إني أسافر البرازيل لاني بحب البلد دي جدا .. بدأت اتعلم اللغة و مكنتش عارفة انا هعرف اسافر ولا لأ لان أهلي كانوا رافضين و مكانش معايا فلوس و لا كنت مصدقة نفسي إني أقدر
يلا بينا نسافر يا جماعة! إتعلمت حاجات كتير .. أكلت أكل كتير مختلف .. سافرت بالطيران الداخلي و بالاتوبيس و
بالعربية عشان اعرف البلد كلها .. عيشت زي أهل البلد .. يلا نعمل كدا!
من التحديات اللي هتواجه حد بيفكر يسافر هي الآتي:
-الفيزا-الإقامة - الأجازة من الشغل
لو بنت بنضيف نقطة موافقة الأهل من عدمه - تذاكر الطيران لو مسافر بلد بعيدة زي ( البرازيل) فيفضل نحجزها بدري .. أنا جبت تذاكري رايح جاي ب 1100 $
نتكلم عن الفيزا في الأول : مهم جدا إننا نجهز ورقنا صح بندخل على موقع السفارة و نملى الابليكيشن و نشوف الورق المطلوب اللي بيبقى ( حجز طيران – حجز فندق- جواب من ال إتش ار – كشف حساب بنكي يكون فيه سحب وايداع (مش شرط المبلغ) بس يكون معقول بحيث يغطي مصاريفك هناك (حسابي في البنك كان 25 ألف جنية)
أنا قدمت كمان على فيزا الشنجن في سفارة البرتغال لان كان عندي ترانزيت طويل في اوروبا (ايطاليا و البرتغال) و الحمد لله طلعتلي من غير مشكلة ( و قضيت يوم عظيم في روما الجميلة مع الجيلاتو و البيتزا) بس بنزود شهادة تحركات على الورق المطلوب فوق دا.
الإقامة : بالنسبالي أنا كنت مقيمة مع أصدقائي هناك بالتالي مصرفتش فلوس كتير على الموضوع دا .. بس دلوقتي في مواقع كتير بنقدر من عليها نحجز اقامة ببلاش في بيت حد من اهل البلد و الفطار بيبقى ببلاش كمان .. نسافر بقى من غير حجج
أنا في رحلتي زرت المدن التالية ( برازيليا – العاصمة – جويانيا – برينوبوليس – انابوليس – ساوباولو – ريو دي جانيرو – كوريتيبا – و بونتا جروسا)
وسائل المواصلات هناك بتبقى الأتوبيس .. مفيش قطر نظرا لطبيعة المكان و ان الأرض مش مستوية في جبال و غابات .. اأتوبيس تذاكرة رخيصة و بيبقى زي كارت ممغنط بتشتريه و تشحنه رصيد و تركب بالمبلغ اللي فيه.. مفيش دفع كاش ف الأتوبيس )
العادات و التقاليد هناك مختلفة عننا .. بس بيشاركونا اهتمامهم بالتجمعات العائلية و بيعيشوا في مجموعات .. بيحبوا الضحك و واخدين الحياة ببساطة و مش عصبيين .. مشفتش حد هناك بيزعق ف الشارع او حتى و هما سايقين.
المرور هناك منظم جدا و مفيش عساكر مرور بس محدش بيكسر الإشارات
معظم الناس عندها عربيات و بتبقى اسهل ف التنقل (بالذات انها مش غالية جدا زي فمصر).
الفواكة الإستوائية هناك مميزة جدا .. اللحمة رخيصة (بس اللحمة المدبوحة حلاح مش متوفرة) القهوة يا جماعة .. ثم القهوة .. دي البرازيل!
بالنسية للأجازة من الشغل : الموضوع دا صعب شوية لان في ناس بيبقى صعب تاخد أجازة من شغلها .. أنا مدة إقامتي في البرازيل كانت تلات شهور تقريبا و كنت واخده أجازة بدون مرتب الفترة دي .
الأهل بيبقوا محتاجين يتطمنوا علينا ف لو قدرنا نوفرلهم معلومات عن البلد اللي رايحينها و نطمنهم بيبقى موافقتهم أسهل .. و كل واحد وشطارته
السفر بيغيرنا .. بيعرفنا حاجات كتير عن نفسنا و عن الناس المختلفة عننا بس مشاركيننا ف الإنسانية.
مصاريف السفر أنا قعدت أحوش فيها سنين .. سنين كنت فيهم مبفكرش غير ف هدفي واي حاجة قدامه بتبقى مش مهمة (نستغنى شوية عن الرفاهيات اللي فحياتنا و نعيش بسيط .. هنعرف نحوش) متعة السفر بتنسيك تعب التحضيرات و القلق.
شكرا لمشاركتك معانا يا مارويتا وان شاء الله تلفي العالم كله.
