تعمل إيه لو جواز السفر ضاع وانت مسافر


السلام عليكم ورحمة الله
بسبب كثرة الأسئلة المتعلقة بضياع الباسبور المصري
الموضوع - عن تجربة - متعب فعلا ورخم فعلا في تركيا وفي مصر .. عشان كده بنقول نصيحة لوجه الله حافظوا علي الباسبور زي عينيكم .

طيب لو ضاع الباسبور مني أعمل ايه !!!

لو هتجدد من السفارة في تركيا هيتكلف ما يقرب من ١١٦٠ ليرة ( تقريبا وليس بالظبط ) وفترة زمنية قد تصل الي ستة أو سبعة أشهر

طيب لو هتسافر تجدد في مصر يبقي الموضوع هيمشي كالتالي

الخطوات المطلوبة في حالة ضياع الباسبور المصري ..

أولا في تركيا 1 - عمل محضر اثبات حالة في القسم الذي تتبع له في بلديتك والحصول علي المحضر ، وللحصول علي الافادة ( المحضر ) لازم تكون مترجم محلف أو معاك مترجم محلف أو صديق تركي ، والأخير ده هو اللي فادني بالفعل لأن المترجم كان بعيد وطلب مني ٥٠٠ ليرة بالتقريب مقابل التواجد معي في القسم لمدة ربع ساعة او نصف ساعة وده مبلغ مبالغ فيه فكان الحل هو الصديق التركي اللي مخدش ولا مليم .

2- هتاخد المحضر تصوره وتحجز طيران مؤكد وصورة شخصية وصورة الباسبور المفقود وتروح علي السفارة المصرية باسطنبول ( في ببك ) قبل موعد السفر بـ ٤٨ ساعة

3 - هتملي ابليكيشن في السفارة الصبح قبل الساعة ١٢ وده للحصول علي وثيقة سفر صالحة فقط للرجوع الي مصر فقط ، وتنتظر الي بعد الساعة ٣ عشان تستلم وثيقة السفر ، والوثيقة بتطلع مجانا بدون اي مصاريف

4 - في المطار وقبل كل شئ عشان متقفش في طابور طويل عريض قبل ختم المغادرة وتوصل لدورك وترجع من الاول تاني ، بقول أهه هتاخد وثيقة السفر وتذكرة الـ Check in بتاعك وتروح مكتب ادارة الهجرة göç idaresi في المطار وده مكتب بيكون أقصي شمالك بعد ما تعدي بوابة التفتيش الأولي بتاع المطار ،وهتعمل حاجة اسمها كونترول علي الوثيقة وطبعا مش هيختملك علي الوثيقة لكن هيختملك علي التذكرة اللي عملت بيها. Check in
ولحد هنا تكون خلصت دنيتك في تركيا وتكون حريص في كل خطوة في المطار علي وجود الاقامة معاك وصورة الباسبور
ثانيا في مصر 5 - أول ما توصل مصر بالسلامة ان شاء الله ياريت متوقفش في طابور ختم الخروج ، روح مباشرة علي ظابط الختم وانت بتاخد كارت الوصول الخاص بالمصريين اديله الوثيقة والبطاقة ولو معاك صورة الجواز كمان وقوله أنا جاي بوثيقة وطبعا هتسمع جملة ( أهلااااااا اركنلي شوية بعد اذنك ) وبعد ما تركن شوية هييجي حد من مباحث الجوازات ياخدك مكتب مباحث الجوازات يستعلم عن تحركاتك الخاصة بالسفر

6- بعد ما يستعلم عنك ويكتب تقرير عنك ويسألك كام سؤال هياخدك لمكتب الأمن الوطني اللي هيستعلموا عنك مرة تانية وهيسألوك شوية أسئلة بتختلف باختلاف الشخصية لأنهم ليهم نظرة في الشخص اللي بيروحلهم

7 - ان شاء الله ميكونش عندك أي مشاكل وغير مطلوب هيبعتوك لمباحث الجوازات مرة تانية ومعاك ورقة انك غير مطلوب

8 - هيروح معاك حد من مباحث الجوازات الي ظابط الختم اللي هيستعلم عن باسبورك تاني علي الحاسب الخاص به وبعدها يختم لك علي ( كارت منفصل ) هو كارت اسمه كده، وده لازم تحافظ عليه زي عينيك لأن من غيره انسي انك تاخد باسبور تاني

9- انت كده يا جميل مبروك عليك خروجك من المطار بالسلامة وياريت ميكونش معاك اي حاجة في شنطك توقفك لأن انت اساسا موقفك مش مستحمل

10 - هتاخد صورة الكارت وصورة الباسبور وصورة المحضر وتطلع علي الجوازات ( مكتب محاضر الفقد ) تعمل محضر فقد تاني وده لو جوازك ساري ، أما لو منتهي فمعرفش التصرف بيكون ايه

11 - محضر الفقد ده بيلف علي ادارة الجوازات اللي بدورها بتبعت تتأكد منه في السفارة وكمان بيروح الامن الوطني تاني وبعدها بيرجع الجوازات مرة تانية

12 - الوقت المستغرق ( زي ما قال لي موظف محاضر الفقد ) من ١٥ يوم الي ثلاثة أشهر وكل واحد وحظه وبعد ما ييجي المحضر تقدر تطلع باسبور جديد
حتي الآن 25-6-2020 لم أستخرج باسبوري لعدم وصول الموافقة الأمنية مع العلم أنني تقدمت للحصول علي بدل فاقد يوم 4-1-2020
يمكن الظروف الراهنة هي السبب، بالتوفيق للجميع كده عرفت كل الخطوات ممكن تشارك المحتوى عشان لو حد سافر وباسوره ضاع يعرف يعمل إيه.


كل التفاصيل الخاصة بالتقديم على فيزا تركيا من مصر هنــــا
لو انت مصري ومقيم فى دولة من دول الخليج
ممكن نقدملك على الفيزا من عندك و هـــنــا كل التفاصيل عنها
 ------------------------------------------------------------
نقوم بتوفير كل شيء بخصوص تركيا
 ( الفيزا - الإستقبال من المطار - حجز الفنادق - برامج للرحلات اليومية  - حجز الطيران الدولي والداخلي - تأجير سيارات خاصة - تأجير شقق مفروشة فى أغلب المدن - تنظيم المعسكرات الرياضية)
متاح أيضا التقديم على الإقامة فى تركيا من هنــــا
والتقديم على دراسة اللغة فى تركيا من هنـــا
* يمكنك التواصل معنا على أرقام مكتبنا فى مصر أو فى تركيا وسنقوم بمساعدتك فى الحصول
على الفيزا سواء زيارة أو سياحة أو إقامة أو دراسة أو عمل او علاج.
للحجز أو الاستفسار عن أي تفاصيل برجاء التواصل معنا على رقم الشركة
مكتب مصر: 00201018647306 _ 00201279309900 
ايميل: Info@Safer4Free.com
مواعيد العمل: من السبت للخميس من الساعة 8 صباحاً لـ 6 مساءًا.
مكتب تركيا: 00905445019185 (WhatsApp)
ايميل: Turkey@Safer4Free.com  
مواعيد العمل: من الأثنين للسبت من الساعة 9 صباحاً لـ 6 مساءًا.
إسطنبول فى إنتظاركم ونتمني لكم رحلة سعيدة
تابع كل عروض سافر من هـنـا